العتابا والميجانا - مختارات من شعر الأستاذ موسى سعد

الشاب الواعد موسى سعد - من بلدة عين قانا
درس الميكاترونيك (ميكانيك + إلكترونيك) في ألمانيا
لامع في غزل خيوط اللغة وتشابكاتها

الفلافل 

عهجرك ردت على أعلى فلا فل
وإنوي عن درب عشقك فلافل
انشقت من لفحة خدودك فلا فل
عطى متلون شذى ونفحة طياب

قلت حلوي 

قلت حلوة قالولي ما اسما؟ رتني!
حفظت إسم البِحِسنا مسمرتني
وعند ما الحب بقلبي مس مرتني
وما خلى دم فيِّ ولا عصاب

رضوان صادق 

رنة صوت صافي وقلب صادق
عرفتو بالومى رضوان صادق
وحرج بعدك أنا بيوم صادق
كرام ومن أجاويد العرب

ميجانا

ما بريد إنكر حُب ولفي وانسى بلْ
برضى بْقلب هام بغرامك وانسبى لْ
شَعر اللي عكتافك تسلسل وانسبلْ
حاكى الدَّمع ياللي كرج عخدودنا

شمستين

من عيونك أنا لامح شمستين
يا من قلبي بكتر حبك شمستين
وإذا جسمك أنا بمسو شي مستين
ألف كونتاك براسي ضرب

اللهم كنت صائم...

الفتن عقلي بكلامك عبر برها

وعصهوة هاﻷصايل عبر برها
الجوارح عم تحنحن عبربرها
لو شعرك ينسدل بين العباب

وصالك

وصالك قد ما عشقي حاولها
بقلبي جبال المحبة حوى لها
عطيتو ياخد الصورة حولها
وحرق قلبي علايكات الحباب

عنقود العنب 

بيغري زنبق خدودك وفللك
ويا روض الحب حاتنسسك وفل ليك
ويا صدر الخام رح بأبش وفلليك
تغل غمار عنقود العنب

جاه اللاهوت

بقربك جاه لاهوتي وعز في
وبحبك ما شبعت لحني وعزفي
ولهالعذال جافيهن وعزفي
وما تلفي عغير موسى حباب

shut down

ندهت لحباب عأبعد بر ما جو لي
وعبث قلت بخيالي برمي جولي
أنا القلبي حبابي برمجولي
وعلى ال-shut down ضيعنا لحباب

ميجانا 

بْوجّ الجفا لما العشق بابك قَفَلْ
وْرجَّع قمر عمري العهجرانك أَفَلْ
عْقَدْت عْلى جسر المعشقة بإسمك قِفِلْ
وِطْمرت مفتاحو بحنين قلوبنا

 

الإستعتاب والميجانا 

حلوة وقساها الحب باستعتابها
ديار الهجرها الولف بست عتابها
مواج لملل لرياح بس تعتى بها
غرقت مراكيب المحبة والهنا

نخر العظام

انخري عظامي بلحظ عينك وإبري
جفن أمضى من اﻷشهب وإبري
أنا المعلول إشفيني وإبري
بغلة بين ضفات العباب

الكرش  والسفن آب

لحظ عينك أنا رشي كرشتو
وإذا بيجني على قلبي كرشتو
ل تعود عالخمر ناجى كرشتو
وصفي يسكر بكرعة سفن آب

عنتر والميجانا

قلبي التعذب في غرامك والحمل
وركع بصبرو ديب ضاري والحمل
موسى اللي شق جبال دربك والحمل
حمل الماشالو هرقل وعنترنا

سيارة CL

قلبي لْبرم عنِّك ليالي وسَّئَل
وعمرو ما حصَّل من نعيمك وسُّئَل
قْصدت البراري عالجوارح و-CL
بركي بمشاويرا بجفُّو دموعنا

الألمعي المغروم

همت بغرامك عالمحبة والمعي
حتى دفعت كل المشاعر والمعي
تباهي برهجة من حلاكي والمعي
غطى سناكي عالنجوم البالسما

شتوتغارت: مدينة في ألمانيا

شو جلتي بفكر موسى وصلتي
وعزفتي بنغمة شواقي وصلتي
ولما اليوم عشتوتغارت وصلتي
شعل قلبي بن ضلوعي وداب

الجفا والبار 

تإسكر عالجفا ليلو وبارو
وتإنسى ملمس زنودك وبارو
حشيل زرار شو انفكوا وبارو
عكترة ما انملع تحتا تياب

الجمر والساعة

صبر أيوب ولو عندو وساعة
ما حاوط لوعة غيابك وساعا
بساعة بدوب عالفرقة وساعة
برمد جمر لي بقلبي لهب

الجدايل 

إذا بقلبك ضمر حبك وجد لي
ما بعرف شو جرى علي وجد لي
أمانة فكفكي زرارك وجدلي
شعر مسدول عألماس ودهب

صبر أيوب 

كتر ما مأبع ضراسي وداعك
دهر أجبر على عيوني وداعك
حيبقى بالقلب ذكرك وداعك
صبر أيوب صابر عالغياب

وتر مي 

لا تقسي عقلب مضنى وترمي
لحظ بَكَّر على مْصابي وترمي
عزفتلِّك من عْصابي وتر مي
وأنيني تْدوْزن بعود ورباب

عودي 

على موسى اعْملي طلِّة وعودي
قلب مُضنى نَحَل روحي وعودي
بْحياتي ما خلفتلِّك وعودي
وبوعدك ما صدق غير المصاب

الفت 

الجفا؟ منك يا ولفي ما جفوتي
بلحاظك يالصايبني ما جفوتي
ويا حلوي كلما بحري ماج فوتي
انعمي بجنة حنيني بالعباب

يلعن أبو البابور شتَّتْ شملنا......

عصدر الخام رمَّانة عصورة
متل شمس الظهر وقفت عُصورا
وأنا مشتاق من طلتك عصورة
تحوِّش من كرم صدرك عنب

رصيف العمر
خْطَيِّ هالزمن كِفْ طار حينو
ويا عمري بعد منُّو طارحينو
وشبابي في نواهم طارحينو
على رْصيف العمر والشعر شاب

الخدود الدسمة
خدودك مدسمة والريق مرقة

وعَغِرْ صهوة جمالك لأ ما رْقى
وتأمرق على صدرك بس مرقة
وإقلب منهل دموعي شراب

وشوشة
لا تسألي غْرامي عليكي وَشْ وِشي؟
أصغي لقلبي ومن حنينك وشْوِشي
روحي! سْحبيها لولا خنتك وشوي شي
وخلّي لْبِقي لجهنّم ولربِّنا

بيت عامر 

تَكَوِّنْ بيت عامر ولَّا عيلي
نْجِدي قلبي بغرامك ولَّا عيلي
سْحَبيلي من عيونك ولِّعيلي
بْلَحِظْ مسنون بِشَرْقط لهب

العيون المنغنشة 

عيونك نغنشوا عيوني وسلّو
وبرى لحظك سيف أشهب وسلّو
قْطفت حسنك جنى غمارو وسلّو
وصرت أُصلي لعنقود العنب

الملك

عن درب حبك يا ولف أنا ما لك
وكنك وزيرة بالعشق أنا ملك
وفنجان قهوة اللي تمسو أناملك
روى الفؤاد وزاد من عمري سنة

عتابا عالفرم...

كنت إسهرلك ليالي وما كنتي

قلب تهدي بصماصيمو مكنتي
هديتك عصرة فكاري مكنتي
فرمتيلي المشاعر والعصاب

شوائب الذهب 

وحق لْبالْوَحي هزِّت نخلها
وعودك لا تظنِّينا نخلها
قبل ما الرب كوَّنها نخلها
ما في ذرِّة شوائب بالدهب

كحل اللحاظ

بِكِحْلك باللِحاظ وْرِتِّي ليلي
قْطُبي جرحي بِسَهم وْرِتِّي لي لي
عْتِنقي دين حُبِّي وْرَتِّليلي
يا بركي بِنْعَم بجنِّة حباب

فتل الدولاب

برمي حظي بدولابك وفتلي
يا من وعدا ﻷحضاني وفتلي
لحظ عينك نخر قلبي وفت لي
عظامي والمشاعر والعصاب

الراس المومخل

تموخل بالحسن راسي ودخني
وقلب دوري يا بوباني ودخني
تعالي وضربي كاسك ودخني
بصحة عشق قلبي للحباب

التسبيح

نكنت رب العشق تت سبحيني
تعي وبعباب حبك سبحيني
على فراقك فؤادي سب حيني
وكفر بعدك بقى يهوى حباب

فتلة وبرمة

عْمَليلك عالقلب فتلي وبرمي
وعلى الفلتات أُصْليلي وبرمي
أنا بالحب عم نيشن وبرمي
وعلى الصايب قنصنا بالحباب

عتابا عالنتف 

وعود الحب لولفك إن تفيهم

صماصيمي حتبقي إنتي فيهم

ولريشاتي أماني إنتفيهم

إذا تْريشن جناحي عالغراب

ختايرة الضيعة...

كبر ضعنك ضرب فتفت وراكي

وسحب نصبي دمع يكرج وراكي
وترك قلبي دبغ داكن وراكي
بعد ما نْتَفْ عشطوط الحباب

الخصر المفتول

رحت فلذات كبدي فت ليه

وجنس حوا الفتني فت ليها

وعلى كلمة خصورك فتليها

انحنى خصرا ولوى متل القصب

العيون المحدقة

يمر الليل وعيوني محدَّق
ومرارة هالزمن متلي ما حد داق
وتمر سنين وبوابي ما حد دق
سوى ريح الملك روحي وغاب

ضلوع الصدر

قبل ما ضلوع صدري تبرميلي

عحي ولو برمة تبرميلي

وزنودك ماس ميلي وتبر ميلي

وأسافة الدهب غطاه التياب

لابقتلك

رحت عالعين وعيوني لقتلك
طلعت لايق إلي لما لقت لك
وإذا ما قتلتني بحبك لقتلك
بحبي وموت في حبك عذاب

الشعر شاب

كنت للقلب أقرب ترى وادنى

ما كان عندك بصيرة ترى ودنا

رجعت هلق عنفسك تراودنا

ما عاد حلوة بعدما الشعر شاب

الغزالي

رحت عالصيد صادتني غزالي
برمش متل الرمح قلبي غزالي
وصرت لجسمها إغزل غزالي
بنول الشعر قطعة من التياب

السماحة

إنوصف قيس الملوح بسماحي
سماحة للشوائب بس ماحي
وأهالي العشق اسمن بالسما حي
ليلى وقيس عشاق العرب

تنسليلي

برضى ضلوع صدري تنسليلي

وما برضى من سنيني تنسي ليلة

خلقت لاعب عيونك تنس ليلة

وليلة دغدغ كروم العنب

النهد

سلاماتي من عبير الشوق نهديك

ويا قلبي من التجافي زاد نهدك

وحسرة بالقلب ما زال نهدك

مغطى بين طيات التياب

جنس حوا

لطف يا طقس بردك وحرك

وساوي يا زمن عدلك وحرك

المشاعر ما حدا هيج وحرك

إلا جنس حوا يا شباب

الحبال الموصولة

سيوف حداب على ضلوعي أصلهم

متى حبالي مع حبالك أصلهم

الجروح من الجفى إنت أصلهم

يا من تكوي فؤادي بنار كيا

أنت السبب

اذكري أيام تشوفيني وشوفك

وقلتيلي الوشو فيي وشو فيك

ولا مرة سألتيني وشو فيك

تعبت حالتي وانتي السبب

أم الجعد

يا إم الجعد عالكتفين صلبي

ما تدري دروبك كتير صلبي

عيسى المسيح إنصلب صلبي

أنا كل يوم قلبي بينصلب

جدوى الآمال

إنت جدوى امالي وإنت مرجاي

إنت زهرة ربيعي ونفل مرجاي

ودخيلك يا حمام الدوح مر جاي

على هجرك شعل قلبي وداب

العظام المبرية

مراهف عينك الحدبات تبري

العظام ولمستك للجرح تبري

قليلة رش عالخدين تبري

وعفرقتك شعل قلبي وداب

الغزلان

سهمك إذا بالصوان غز لان

وبصير سكران والريان غزلان

وما بكفي عيونك عين غزلان

متل جيد المها العنق نسكب

العبرا

 دروب الموت من أجلك بعبرا

وحياتي بجمل حبك بعبرا

عيونك لو هطل دمعن بعبرا

رجع طوفان نوحك يا خشب

رسايل الحب

والله ورسايل حب بيدك تكتبيها

جبالي من حروفا تكت بيها

والله عطيني رموش عينك تكت بيها

ضلوعي وقيد من نارا لهب

مارادونا

يابا إذا أحباب قلبي ما رادونا

وعيونك عاندونا وما رادونا

بملعبكن تأعمل مارادونا

وبكل شوطة هدف دق لبواب