مدونة جبل عاملة: أحمد شعيب

‏إظهار الرسائل ذات التسميات أحمد شعيب. إظهار كافة الرسائل

من قصيدة للشاعر أحمد شعيب
راح الحبيب الكنت إشكيلو .... أمري ، ويحكيلي وإحكيلو
وبيسألوني الناس وينو صار ..... لو عرفو ، قلبي بوديلو
راح وتركلي النار والتذكار...... والشوق وقراية مراسيلو
ولوعة فراق ودمعتين كبار...... يتفرفطو عالخد ، ويسيلو
سهران غنّي قبال رسمو شعار ... وغفّيه عا صدري وإحديلو
لا بتهْمو قاسي ولا غدّار ... ولو شالني من البال ما بشيلو
كل ما مرق نسمه وجانح طار... عتاب وسلام وحُب بهديلو
وعا كل معبد بلحق الزوّار ... بصلّي بقلب خاشع وبدعيلو
وكل ما بشفلي عالدرب بصّار...... داير على اللقمه بناديلو
دخلك تعا يا كاشف الأسرار ........ وبيلتقي جنوني بتدجيلو
والبوسطجي البيوصّل الأخبار... من بعيد كل ما يطل بوميلو
شو في معك من خجلتو بيحتار...وبدموع طفل صغير ببكيلو
وعا كل ماضي بنقل الأفكار... بروح وبجي وبوقف مقابيلو
بلملم عن العشّاق والشُعّار........... شو أّلفو وبصير غنّيلو
نادر نِدر لما بيجي عالدار ........لا أفرح ولا شموع ضوّيلو
ولا رح بزينلو بورد أو غار ..... رح ودّعو وأودع معو قلبي
اللي مطرّزو عا طراف منديلو

قالوا افرحوا وانسوا المآسي والخطوب

بكرسي نظام جديد غفران الذنوب

جاوبتهم يا شعب من أغبى الشعوب

شوفوا الطفالى والحريم على الدروب

ويا أهل شبعا اسألوا اللي عم ينوب

و اللي بأفيون الوعد عزّوا القلوب

مليون طلقة بإهدن لْعين الرئيس

وممنوع طلقة نار ع حدود الجنوب

الشاعر أحمد شعيب - تشرين اول 1970

أحمد محمد شعيب (1935 - 2003)، شاعر زجلي ولد وتوفي في بلدته الشرقية.

له 8 دواوين زجلية، غنّى في بداية مشواره في جوقة خليل روكز قبل أن يهاجر لأفريقيا حيث قضى جلّ حيته هناك.

* ممنوع طلقة نار ع حدود الجنوب - شعر أحمد شعيب 1970
* راح الحبيب - شعر أحمد شعيب