قصيدة بعنوان " آخر ليل" من وحي كربلاء الإمام الحسين " ع " بالعامية اللبنانية - من شعر الأستاذ إبراهيم حمزة :
بالطف حطو رحالهم
مطرح ما حط الموت
هونيك بقيو رجالهم
وما ضل في غير النسا
وأيتام جفلها القسى
بالطف حطو رحالهم
هونيك بقيو رجالهم
تركوا مواقع هالدني
اللي تلوثت بالكفر
رسموا مواقع دنيتن
رسموا خيوط الفجر
ونوروا هالليل .. آخر ليل
وكان الصدى من خيامهم
جايي عا صهيل الخيل
وجايب معو حكايه :
حكاية نبي ..آخر نبي
حكاية ولي بحضنو ربي
حكاية أهل وصحاب
تركو الدني خلفن
وتمسكو بكتاب
كان آخر ليل من عمر الدني
وشو كان فيهم مغتني
كلو صلا وتسبيح
وتمضمضو بالريح
وتيمموا بتراب
..وكان النهر من حدهم جاري
وبحالهم يا نهر مش داري :
إنو الحسين بجيرتك عطشان
وإنو الطفل مذبوح بالميدان
وضل النهر ساري
وقرب العباس لابس لامتو
وحامل القربه
وجرد حسامو تا وصل للنهر
وشاف النهر مسبي
وإنو البطل ما بيرتوي من المي
وما بيخلد بشربه
يا حامل القربه
بعدا العقيلة ناطره تا يشربو الأطفال
معقول يا ساقي العطاشى يشربو
وبينك وبينن في الف خيال
كان الصدى ..آخر صدى
غطى على كل المدى
والناس كانو نايمين
ما حدن منهم فاق
وكانو ملايكة السما عم يرصدو
ما في حدا
لبى الندا
يا غبنتك يا عراق
يا غبنتك يا عراق
تترك اسياد الدني بإيد الردى
يا غبنتك يا عراق
